Mat 26 | BOJ | STEP | Yesus a na aqa aŋgro naŋgi anjam degsi minjrsiq koboonaqa olo anjam bei endegsi minjrej,

Matthew 26

Atra tamo kokba ti Juda gate kokba ti naŋgi koroosib Yesus ojsib qalib moiqajqa deqa qairoqneb

1 Yesus a na aqa aŋgro naŋgi anjam degsi minjrsiq koboonaqa olo anjam bei endegsi minjrej, 2 “Niŋgi qalie, Juda naŋgo yori bati koba jojomqo. Bati aiyel unu. Qotei a nami Israel naŋgi Isip sawaq dia padalqa laqnabqa eleŋosiq aqaryainjrej. Iga deqa olo are qalqajqa bati agi jojomqo. Deqa yori bati di brantimqa Juda gate kokba naŋgi na e Tamo Aŋgro ojsib jeu tamo naŋgo baŋq di e atibqa naŋgi na e ŋamburbasq di lubib moiqai.” Yesus a na aqa aŋgro naŋgi degsi minjrej.

3 Yori bati koba di jojomej deqa atra tamo kokba ti Juda gate kokba ti naŋgi gilsib atra tamo gate aqa ñam Kaiafas aqa talq di koroeb. 4 Koroosib naŋgi gisaŋ anjam bei Yesus aqa jejamuq di qametqa maroqneb. Yim naŋgi a ojsib qalib moiqajqa deqa. 5 Ariya naŋgi endegsib maroqneb, “Iga yori bati qa Yesus ojqasai. Ojqom di tamo uŋgasari naŋgi iga nugsib ŋiriŋosib qoto tigelo uge.”

Uŋa bei a goreŋ quleq boledamu Yesus aqa gateq di bilentej

6 Onaqa Yesus a Betani qureq gilsiqa tamo bei nami jejamu yu na ugetej qaji aqa ñam Saimon aqa talq di soqnej. 7 Sosiqa iŋgi uyeqnaqa uŋa bei a goreŋ quleq tulaŋ boledamu silali kobaquja na awaiyej qaji di jaliŋaq jigsiqa osi bosiqa Yesus aqa gateq di bilentej. 8 Onaqa Yesus aqa aŋgro naŋgi uŋa di aqa kumbra unsibqa naŋgi ŋiriŋosib segi segi maroqneb, “Uŋa di a kiyaqa goreŋ di laŋa ñaŋguiyqo? 9 A goreŋ di osim tamo qudei enjrqo qamu silali kobaquja yonub qamu gilsim tamo iŋgi iŋgi saiqoji unub qaji naŋgi jeisi enjrqo qamu di kere.”

10 Onaqa Yesus a naŋgo areqalo di qalieosiqa minjrej, “Niŋgi uŋa di gulube yaib. A kumbra bole ebqo. 11 Tamo iŋgi iŋgi saiqoji unub qaji naŋgi bati gaigai niŋgi ti sqab. Ariya e bati gaigai niŋgi ti sqasai. 12 E moiqai. Moiitqa e subq atqab. Uŋa a deqa are qalsiqa namoqna ijo jejamuq di goreŋ bilentsiq dena ijo jejamu subq atqa gereiyetbqo. 13 Niŋgi quiye. E bole merŋgwai. Bunuqna ijo anjam maro tamo naŋgi sawa sawa kalilq dia ijo anjam bole mare mare laqnsibqa uŋa endi ijo jejamuq di goreŋ bilentqo qaji a qa are qaloqnsib maroqnqab.”

Judas a Yesus osim atra tamo kokba naŋgo baŋq di atqajqa anjam qosej

14 Onaqa Judas Iskariot a tigelosiqa atra tamo kokba naŋgoq gilej. Judas a Yesus aqa aŋgro 12-pela naŋgi deqaji bei. 15 A naŋgoq gilsiqa minjrej, “Niŋgi na awai kie ebibqa e Yesus osiy nuŋgo baŋq di atqai?” Onaqa naŋgi na meniŋ silali 30 yeb. 16 Yonab a gilsiqa a Yesus osim naŋgo baŋq di atqajqa gam ŋamoqnej.

Yesus aqa aŋgro naŋgi koba na yori bati aqa iŋgi uyeb

17 Ariya Bem Tiyosai Qaji Uyqajqa Bati brantonaqa Yesus aqa aŋgro naŋgi na aqa areq bosib minjeb, “O Tamo Koba, ni iga merge. Iga aisim tal qabia yori bati aqa iŋgi iŋgi gereiyetmonamqa ni iŋgi uyqam?” 18 Onaqa Yesus na kamba minjrej, “Niŋgi aisib qure ambleq dia tamo bei itqab. Itosib minjiye, ‘Tamo Koba a marqo, “Ijo bati jojomqo. Deqa e ijo aŋgro naŋgi koba na ino talq di awoosim yori bati aqa iŋgi uyqom.” ’” 19 Onaqa Yesus aqa aŋgro naŋgi qure miligiq aisib anjam kalil Yesus na minjrej qaji degsi brantonab dauryosib iŋgi iŋgi kalil gereiyeleŋeb.

20 Onaqa bilaqtonaqa Yesus aqa aŋgro 12-pela naŋgi koba na aisib tal miligiq gilsib awoosib iŋgi uyoqnsibqa Yesus a naŋgi endegsi minjrej, “Niŋgi quiye. E bole merŋgwai. Niŋgi ijo aŋgro 12-pela. Nuŋgo ambleq dena ijo aŋgro bei tigelosimqa e ojsim jeu tamo naŋgo baŋq di e atqas.” 22 Degsi minjrnaq qusibqa naŋgi are tulaŋ gulubeinjrnaqa segi segi Yesus nenemyoqneb, “O Tamo Koba, ni e qa kio maronum?” 23 Onaqa minjrej, “Aŋgro aqo ombla endego tabir qujaiq dia bem quiq di tuqtoqnsim uyeqnum aŋgro dena e ojsim jeu tamo naŋgo baŋq di atqas. 24 Niŋgi quiye. E Tamo Aŋgro moiqai. Nami Qotei aqa anjam degsib neŋgreŋyeb unu. Deqa uŋgum. E anjam di dauryosiy moiqai. Ariya tamo e ojsim jeu tamo naŋgo baŋq di atqas qaji a tulaŋ padalougetqas. A nami ŋambabosai qamu di kere.” 25 Onaqa Judas a segi na Yesus nenemyej, “O Tamo Koba, ni e qa kio ubtsim maronum?” Onaqa Yesus na kamba minjej, “Od. Anjam agi ni na maronum.”

Yesus na aqa aŋgro naŋgi bem ti wain ti enjrej

26 Osiqa aqa aŋgro naŋgi koba na iŋgi uyoqnsibqa a Qotei pailyosiqa bem bei osiq giŋgeŋyosiqa aqa aŋgro naŋgi enjrsiqa endegsi minjrej, “Endi ijo jejamu. Osib uyiye.” 27 Osiqa wain osiqa gambaŋq di bilentosiqa Qotei pailyosiqa aqa aŋgro naŋgi enjrsiqa minjrej, “Niŋgi kalil wain endi uyiye. 28 Endi ijo leŋ. Tamo uŋgasari gargekoba naŋgo une kobotetnjrqajqa deqa ijo leŋ aisim Qotei aqa anjam bunuj nami gereiyej qaji di siŋgilatqas. 29 Ariya niŋgi quiye. E wain endi olo uyqasai. Degsi gilsiy gilsiy mondoŋ diŋo bati qa ijo Abu a nuŋgo Mandor Koba soqnimqa e niŋgi koba na awoosiy olo wain bunuj uyqai.”

30 Yesus a na aqa aŋgro naŋgi anjam degsi minjrsiqa naŋgi koba na louosib koboonaqa tal uratosib Oliv manaq oqeb.

Yesus na aqa aŋgro naŋgi minjrej, “Niŋgi kalil e uratbosib jaraiqab.”

31 Naŋgi manaq oqoqnsibqa Yesus na minjrej, “Qolo qujai endeqa niŋgi kalil ijo ñam ulontosib e uratbosib jaraiqab. Nuŋgo kumbra deqa Qotei aqa anjam bei nami endegsib neŋgreŋyeb unu, ‘E na kaja naŋgo mandor qalitqa kaja naŋgi segi segi jaraiqab.’ Qotei aqa anjam nami degsib neŋgreŋyeb. 32 Ariya bati qalub koboamqa e olo subq na tigelosiy niŋgi qa namoosiy Galili sawaq gilitqa niŋgi bunuqna e daurbosib dia e itbqab.” 33 Onaqa Pita na minjej, “Aŋgro kalil naŋgi ino ñam ulontosib jaraiqab e segi ino ñam ulontqasai.” 34 Onaqa Yesus na minjej, “Ni que. E bole mermqai. Qolo qujai endeqa tuwe anjamosaisoqnimqa ni gisaŋoqalubtsim marqam, ‘E Yesus qaliesai.’” 35 Onaqa Pita a tulaŋ saidosiq minjej, “Sai. E ni ombla moiqa marimqa uŋgum e ino ñam ulitqasai bolesai.” Onaqa Yesus aqa aŋgro kalil naŋgi anjam qujai di minjoqneb.

Yesus a nañu agu Getsemane dia aqa Abu pailyej

36 Ariya naŋgi koba na walwelosib manaq oqsib nañu agu beiq di branteb. Nañu agu di aqa ñam Getsemane. Dia brantosib Yesus na aqa aŋgro naŋgi minjrej, “Niŋgi endia awesoqniye. E kiñala sasalosiy ijo Abu pailyosiy bqai.” 37 Degsi minjrsiqa aqa aŋgro qalub agi Sebedi aqa ŋiri aiyel naŋgi Pita koba na joqsiqa pailyqajqa sasalej. Sasalosiqa pailyoqnsiqa a are tulaŋ gulubekobaiyej. 38 Osiqa aqa aŋgro qalub naŋgi minjrej, “E are tulaŋ gulubekobaibqo. Gulube dena e moiepratonum. Deqa niŋgi e ombla endia sosimqa ŋam atoqniye.” 39 Degsi minjrsiqa olo kiñala sasalosiqa mandamq di ŋam quosiqa Qotei pailyosiq minjej, “O ijo Abu, gam bei soqnimqa ni na marimqa gulube endi e qa baiq.” Degsi pailyosiqa olo urur are qalsiq endegsi pailyej, “Uŋgum, ni ijo areqalo dauryaim. Ni ino segi areqalo dauryosim ye.”

40 Yesus a degsi Qotei pailyosiqa olo tigelosiqa aqa aŋgro naŋgo areq aisiq unjrej naŋgi are gulube na ŋereŋesoqneb. Deqa Yesus na Pita minjej, “Niŋgi e ombla na ŋam sokiñalayqa keresai e? 41 Niŋgi ŋereŋaib. Niŋgi ŋam sosib pailyoqniye. Amqa gulube bei nuŋgoq bqas dena niŋgi uneq waiŋgwasai. Bole, nuŋgo areqalo kalil e daurbqajqa unu. Ariya niŋgi segi gulube di oqajqa siŋgila saiqoji.”

42 Degsi minjrsiqa olo puluosi sasalosiq endegsi Qotei pailyej, “O ijo Abu, e na gulube endi uratqa gam bei saiamqa uŋgum ni ino segi areqalo dauryosim marimqa e gulube endi oqai.” 43 Degsi pailyosiq bosiqa aqa aŋgro qalub naŋgi urŋamnjrnaqa ŋereŋesonab unjrej. 44 Unjrsiqa olo naŋgi uratnjrsiq puluosi gilsiq aqa anjam nami pailyej qaji degsi olo pailyej.

45 Ariya Yesus a pailyo koboonaqa a olo tigelosiqa aqa aŋgro naŋgo areq aisiq minjrej, “Niŋgi aqaratosib geregere ŋereŋejunub e? Uŋgum. Bati koboqo. Niŋgi ŋam atsib uniye. E Tamo Aŋgro ojsib une tamo naŋgo baŋq di atqajqa bati agi bqo. 46 Niŋgi tigelab gilqom. Tamo e ojsim jeu tamo naŋgo baŋq di atqajqa agi brantqo.”

Judas na Yesus osiq jeu tamo naŋgo baŋq di atej

47 Onaqa Yesus aqa aŋgro 12-pela naŋgi deqaji bei agi Judas a na qaja tamo gargekoba naŋgi sebru ti torom ti eleŋonab joqsiqa Yesus aqa areq di branteb. Atra tamo kokba ti Juda gate kokba ti naŋgi na naŋgi qariŋnjrnab Yesus ojqa beb. 48 Tamo Yesus ojsim jeu tamo naŋgo baŋq di atqas qaji a nami naŋgi ti anjam gereiyosib minjrej, “E na tamo kundoqyqai agide. A ojsib osib giliye.” 49 Onaqa Judas a Yesus aqa areq bosiq minjej, “O Tamo Koba, kaiye.” Degsi minjsiq kundoqyej. 50 Kundoqyonaqa Yesus na minjej, “O was, ni kiyaqa bonum?” Degsi minjnaqa qaja tamo naŋgi brantosib baŋ waiyosib Yesus ojeb.

51 Onaqa Yesus aqa aŋgro bei na aqa sebru osiqa atra tamo gate aqa kaŋgal tamo bei gateq di qalqajqa waiyej grotosiqa dabkala segi gentetej. 52 Onaqa Yesus na aqa aŋgro di minjej, “Ino sebru olo ate. Tamo bei na tamo bei sebru na qalqas di a kamba sebru na qalib moiqas. 53 E na ijo Abu minjitqa a na laŋ aŋgro 72,000 naŋgi qariŋnjrimqa bosib e aqaryaibqa kere. Ni deqa qaliesai kio? 54 Ariya e degsi ijo Abu minjqasai. Deqa aqa anjam bei nami neŋgreŋyeb qaji di aqa damu brantqas. Agi nami endegsib neŋgreŋyeb, ‘Kristus a moiqas.’”

55 Yesus a na aqa aŋgro di degsi minjsiqa olo qaja tamo naŋgi minjrej, “E leŋ ojo tamo deqa kio niŋgi sebru ti torom ti eleŋosib e ojqa bonub? E bati gaigai atra tal miligiq dia niŋgi koba na sosimqa tamo uŋgasari naŋgi Qotei aqa anjam minjroqnem bati deqa niŋgi yala baŋ waiysib e ojosai. 56 Niŋgi kumbra di yeb deqa Qotei aqa medabu o tamo naŋgo anjam nami neŋgreŋyeleŋeb qaji di aqa damu agi brantqo.” Yesus a naŋgi degsi minjrnaqa aqa aŋgro kalil naŋgi a uratosib jaraieb.

Atra tamo kokba ti Juda gate kokba ti naŋgi Yesus aqa jejamuq di anjam qamqajqa deqa koroeb

57 Onaqa qaja tamo naŋgi na Yesus osib atra tamo gate aqa ñam Kaiafas aqa talq osi gileb. Osi gilsib Juda gate kokba ti dal anjam qalie tamo naŋgi ti kalil koroesonab naŋgo ulatamuq dia tigelteb. 58 Ariya naŋgi Yesus osi gileqnabqa Pita a kiñala isa isaq na Yesus dauryosiq uli uliosiq gilsiq torei atra tamo gate aqa tal meq di brantej. Brantosiqa naŋgi Yesus kieryib unqajqa deqa qaja tamo qudei naŋgo ambleq di awesoqnej.

59 Onaqa atra tamo kokba ti Juda gate kokba ti naŋgi kalil koroosibqa Yesus aqa jejamuq di anjam kie qamsib dena a qalib moiqajqa deqa qairoqneb. 60 Anjam ŋamonab ŋamonab ugeinjrej. Naŋgi Yesus aqa une bei itosai. Deqa naŋgi na tamo gargekoba metnjrnab bosib gisa gisaŋ anjam Yesus aqa jejamuq di qameleŋoqneb. Ariya naŋgi degyeqnabqa naŋgo ambleq dena tamo aiyel tigelosibqa Yesus aqa jejamu laŋa gisaŋyosib mareb, 61 “Yesus a endegsi marnaq iga quem, ‘E Qotei aqa atra tal kobaquja endi koŋgrontosiyqa bati qalub qa olo tigeltqa kere.’”

62 Onaqa atra tamo gate a naŋgo anjam di qusiqa a tigelosiqa Yesus aqa areq bosiq nenemyej, “Tamo naŋgi di anjam gargekoba ni qa mareqnub. Di ni kamba anjam bei marqasai e?” 63 Onaqa Yesus a torei mequmej. A anjam bei yala marosai. Deqa atra tamo gate na olo nenemyej, “Qotei ŋambile gaigai unu qaji aqa ñam na e ni nenemmqai, ni Kristus e? Ni Qotei aqa Ŋiri e? Ni e merbe.”

64 Onaqa Yesus na minjej, “Od. Anjam agi ni na maronum di kere. Ni que. E ni mermqai. Bunuqna e Tamo Aŋgro laŋ qureq oqsiy Qotei siŋgila koba ti unu qaji aqa baŋ woq di awesosiy olo laŋbiq na boqnit niŋgi e nubqab.” 65 Onaqa atra tamo gate a Yesus aqa anjam di qusiqa a tulaŋ minjiŋ oqetonaqa aqa segi gara jugo bumbraŋyosiqa marej, “Aqa une agi a segi babtqo iga quonum. Deqa kiyaqa tamo bei olo metonam bosim aqa une marqas? Aqa misiliŋ anjam agi niŋgi quonub. 66 Deqa niŋgi kiersib marqab?” Onaqa naŋgi kalil mareb, “A bole une ti. Deqa qalib moiem.”

67 Naŋgi kalil degsib marnabqa naŋgo ambleq dena tamo qudei naŋgi tigelosib Yesus aqa ulatamuq di miselyoqnsib baŋ na qaloqneb. Osib aqa ŋamdamu gara na qosetosib ula poŋyoqnsib minjoqneb, “Ni Kristus amqa ni ubtsim mare, yai na ni lumqo?”

Pita a gisaŋoqalubtosiq marej, “E Yesus qaliesai.”

69 Ariya Pita a tal meq di awesonaqa kaŋgal uŋa bei na aqa areq bosiqa minjej, “Ni dego Yesus Galili qaji aqa aŋgro bei. Ni nami a daurysi laqnem.” 70 Onaqa Pita a tamo kalil naŋgo ŋamgalaq dia tulaŋ saidosiq uŋa di minjej, “Ni anjam merbonum di e qaliesai.” 71 Degsi minjsiqa tigelosiq tal qala beiq gilsiq di soqnej. Sonaqa kaŋgal uŋa bei na olo Pita unsiqa tamo naŋgi Pita aqa areq di tigelesoqneb qaji naŋgi minjrej, “Tamo di a dego Yesus Nasaret qaji aqa aŋgro bei. A nami Yesus daurysi laqnej.” 72 Onaqa Pita a olo tulaŋ saidosiq marej, “E tamo di qaliesai bolesai. E bole maronum.” 73 Olo kiñala soboleiyonaq tamo qudei jojom di tigelesoqneb qaji naŋgi Pita aqa areq bosib minjeb, “Iga ino anjam maro na qalieonum, ni Galili qaji tamo. Dena iga poigwo, ni Yesus aqa aŋgro bei.” 74 Onaqa Pita a olo tulaŋ siŋgila na saidosiq marej, “E tamo di qaliesai bolesai. E bole maronum. E gisaŋot Qotei na e lubem.” A degsi marnaqa tuwe anjamej. 75 Tuwe anjamonaqa Pita a qusiqa anjam nami Yesus na minjej qaji, “Tuwe anjamosaisoqnimqa ni gisaŋoqalubtsim marqam, ‘E Yesus qaliesai,’” anjam deqa olo are qalsiqa poiyonaqa oqedosiqa tulaŋ akamugetej.